යාළුවාගේ බයික් එකේ පසුපස ගිය තරුණයා නිකරුනේ ම රුට දෙවුන්දර සිද්ධියේ කදුලු කතාව
ජාත්‍යන්තර මත්ද්‍රව්‍ය ජාලයක් හරහා ලැබුණු මත්ද්‍රව්‍ය තොගයක් සොරකම් කිරීමේ ප්‍රතිඵලයක් ලෙස දෙවිනුවර දී තරුණයන් දෙදෙනෙකු ඝාතනය කර ඇති බව දැන් වාර්තාවේ.
පොලීසිය අධිකරණයට වාර්තා කර ඇති ආකාරයට, මත්ද්‍රව්‍ය සොරකම් කිරීමේ චෝදනාව එල්ල වී ඇත්තේ මෙම සිද්ධියෙන් මරණයට පත්වූ යොමේෂ් නදීෂාන් නැමැත්තාටය. මිය ගිය පසිදු තාරක ඔහු සමඟ එකට යතුරු පැදියේ ගමන් කිරීම හේතුවෙන් මෙම අපරාධයට ගොදුරු වී ඇති බව පොලීසිය දැනුම් දී තිබේ.
සිද්ධියට සම්බන්ධ තවත් සැකකරුවෙකු ගන්දර පොලිස් වසමේදී අත්අඩංගුවට ගෙන තිබේ. අත්අඩංගුවට ගත් සැකකරු දෙවිනුවර ප්‍රදේශයේම පදිංචි 34 හැවිරිදි පුද්ගලයෙකි.
වෙඩිතැබීම සඳහා සැකකරුවන් පැමිණි බවට සැකකරන වෑන් රථයට ඔවුන් විසින්ම ගිනි තබා අනර්ථය සිදු කිරීමේ අපරාධය සම්බන්ධයෙන් අත්අඩංගුවට ගෙන ඇති බව පොලීසිය පවසයි.
මෙම ඝාතන සිද්ධිය සම්බන්ධයෙන් සැක පිට කාන්තාවක ඇතුළු සැකකරුවන් සිව් දෙනෙකු අත්අඩංගුවට ගෙන ඇති අතර, ඔවුන් ලබන 29 වන දින දක්වා දින 07 ක් රඳවා තබා ගෙන ප්‍රශ්න කිරීමට අධිකරණය අවසර ලබා දී තිබේ.
මාතර දෙවුන්දර ශ්‍රී විෂ්ණු දේවාලය අසලදී සිදුවූ මෙම ද්විත්ව ඝාතනය රුපියල් ලක්ෂ 50ක කොන්ත්‍රාත්තුවක් මත සිදු කර ඇති බවද ගන්දර පොලීසිය හෙළි කර සිටී. අත්අඩංගුවට ගත් සැකකරුවන් අතර ගන්දර සහ දෙවිනුවර ප්‍රදේශවල පදිංචි 23 හැවිරිදි කාන්තාවක් සහ වයස 46 පසුකරන පුරුෂයින් තිදෙනෙකු සිටිති.
පොලීසිය ප්‍රකාශ කරන පරිදි, දැනට ඩුබායි රාජ්‍යයේ සැඟවී සිටින සංවිධානාත්මක අපරාධකරුවෙකු මෙන්ම මත්ද්‍රව්‍ය ජාවාරම්කරුවකු වන “බාලේ මල්ලි” නමින් හඳුන්වන ෂෙහාන් සත්සර නැමැත්තා විසින් මෙම ඝාතනය මෙහෙයවා ඇති බවට සැක කෙරේ.
ඝාතනයට ලක්වූ පුද්ගලයින් වන්නේ දෙවුන්දර ප්‍රදේශයේ පදිංචි වයස අවුරුදු 29ක් වූ පසිඳු තාරක සහ අවුරුදු 28ක් වූ යොමේෂ් නදීෂාන් යන දෙදෙනාය. ඔවුන් කපුගම්පුර ප්‍රදේශයේ නිවසක පැවති උපන්දින සාදයකට සහභාගී වීමට ආරාධනා ලැබී තිබුණද, එම නිවසට නොගොස් ඒ අසල පිහිටි තවත් මිතුරෙකුගේ නිවසේ මත්පැන් සාදයක් පවත්වා ඇත. මත්පැන් සාදය අවසන් වී නිවස් වෙත යැමට යතුරුපැදියෙන් පිටත්ව යද්දී ඔවුන් ඉලක්ක කරගෙන ප්‍රහාරය එල්ල කර ඇත.
මාතර දෙවුන්දර ශ්‍රී විෂ්ණු දේවාලයේ දකුණු වාහල්කඩ ඉදිරිපස සිංහාසන මාර්ගයේ රාත්‍රී 11.45ට පමණ මෙම ඝාතනය සිදුවී ඇත. ටී-56 හා මිලිමීටර් 9 වර්ගයේ ගිනිඅවි දෙකකින් මෙම වෙඩිතැබීම සිදුකර ඇති අතර,
වෙඩි වැදුණු තරුණයින් දෙදෙනා එම ස්ථානයේදීම ජීවිතක්ෂයට පත්ව ඇති බව පොලිසිය පවසයි.
තරුණයින් දෙදෙනා පැමිණි යතුරුපැදිය පසුපසින් වෑන් රථයෙන් ලුහුබැඳ ගිය වෙඩික්කරුවන් එය යතුරුපැදියට හප්පා, අනතුරුව වෙඩිතබා ඇති බවට පොලීසිය සිදුකළ මූලික විමර්ශනවලදී අනාවරණය වී තිබේ. මෙම ප්‍රහාරයට පෙර, ප්‍රහාරයට ලක්වූ තරුණයින් සිටි නිවස අසලට ද වෙඩික්කරුවන්ගේ වෑන් රථය පැමිණෙන අයුරු ප්‍රදේශයේ ස්ථාපිත සී.සී.ටී.වී. කැමරාවක සටහන් වී තිබුණි.
වෙඩි තැබීම සිදුවූ ස්ථානයේදී ටී-56 උණ්ඩ කොපු 39ක් හා මිලිමීටර් 9 වර්ගයේ උණ්ඩ කොපු 03ක් සොයා ගැනීමට පොලිසිය සමත් වී ඇත. වෙඩික්කරුවන් පැමිණි වෑන් රථය, වෙඩිතැබීම සිදුවූ ස්ථානයේ සිට මීටර් 800ක් පමණ දුරින් පිහිටි දෙවුන්දර වරාය මාර්ගයේ ගිනිතබා ගොස් තිබියදී පොලීසිය විසින් සොයාගෙන ඇත. එම වෑන් රථය තුළ ටී-56 ගිනි අවි සඳහා භාවිතා කරන මැගසීනයක් හා තවත් ටී-56 උණ්ඩ කොපු හමු වූ බව පොලිසිය පවසයි.
වෙඩිතැබීම සිදුවූ ස්ථානයේ මහෙස්ත්‍රාත් පරීක්ෂණය මාතර අතිරේක මහෙස්ත්‍රාත් මාලන් ශිරාන් ජයසුරිය මහතා විසින් අළුයම සිදු කර ඇත. ඝාතනයට ලක්වූ තරුණයින් දෙදෙනාගේ දේහයන් මාතර මහ රෝහලේ තැන්පත් කර ඇති අතර, පශ්චාත් මරණ පරීක්ෂණ කටයුතු අවසන් වීමෙන් පසු දේහයන් ඔවුන්ගේ පවුලේ ඥාතීන් වෙත භාර දීමට නියමිතය.
ඩුබායි හි සැඟව සිටින “බාලේ මල්ලි” නම් අපරාධකරු විසින් මෙම ඝාතනය මෙහෙයවා ඇති බවට පොලිසිය දැඩි ලෙස සැක පළ කරයි. මීට පෙර මියගිය යොමේෂ් නදීෂාන් යන අයට ඔහු “ඔය මුළු පවුලම මරනවා” ලෙස දුරකථන පණිවුඩයක් යවා ඇති බව වාර්තා වී තිබේ. “බාලේ මල්ලි” සහ මෙම තරුණයින් දෙදෙනා අතර කලක සිට පවතින ආරවුලක් හේතුවෙන් මෙම ඝාතනය සිදු කර ඇති බවටද පොලිසිය සැක පළ කරයි.
මේ අතර වසරේ මේ දක්වා කාලය තුළ වෙඩි තැබීමේ සිදුවීම් 26කින් පුද්ගලයින් 22 දෙනෙකු ජීවිතක්ෂයට පත්ව ඇති බව වාර්තා වී තිබේ. මෙය රටේ අපරාධ සංඛ්‍යාවේ ඉහළ යාමක් පෙන්නුම් කරන බැවින් පොලීසිය විශේෂ විමර්ශන ආරම්භ කර ඇති බව ද වාර්තා වේ.
මෙම සිද්ධිය සම්බන්ධයෙන් ගන්දර පොලීසිය හා මාතර කොට්ඨාස අපරාධ විමර්ශන කාර්යංශය වැඩිදුර විමර්ශන සිදුකරමින් සිටිති. පොලීසිය ප්‍රකාශ කළේ දඩයමට ලක්වූ පුද්ගලයින්ට එරෙහිව සංවිධානාත්මක අපරාධ ජාලයක් හා මත්ද්‍රව්‍ය ජාවාරම්කරුවන් සම්බන්ධ වී ඇති බවට තහවුරු වී ඇති බවයි.
ජාත්‍යන්තර තලයේ සිට මෙවැනි අපරාධ සිදු කෙරෙන බැවින් ශ්‍රී ලංකා පොලීසිය විදේශ රටවල් සමඟද සම්බන්ධීකරණය වී ඩුබායි හි සැඟවී සිටින සැකකරු අත්අඩංගුවට ගැනීමට කටයුතු කරමින් සිටින බව වැඩිදුරටත් දැන ගන්නට ලැබී තිබේ.
Gossip lanka news
