පුටින්ගෙන් දැඩි නියෝගයක්
එක් මිසයිලයකින් මුළු එක්සත් රාජධානියම බිමට සමතලා කළ හැකි රුසියාව සතු මාරාන්තිකම අවිය ලෙස සැලකෙන “සාතන් 2” අන්තර් මහද්වීපික න්‍යෂ්ටික මිසයිලය හැකි ඉක්මණින් යුද්ධය සඳහා සූදානම් කරන ලෙස රුසියානු ජනාධිපති සිය හමුදාවට නියෝග කර ඇතැයි පැවැසෙයි.
රුසියානු න්‍යෂ්ටික අවි ගබඩාවේ තිබෙන මාරාන්තිකම අවියක් ලෙස සැලකෙන “සාතන් 2” අන්තර් මහද්වීපික මිසයිලය පැයට සැතැපුම් 16,000 ක වේගයකින් ගමන් කිරීමේ හැකියාව තිබෙන අතර එයට එක්සත් රාජධානිය සහ ඇමෙරිකාවට ඉතාමත් පහසුවෙන් ළඟා වීමට හැකියාව පවතී. “සාතන් 2” අන්තර් මහද්වීපික මිසයිලයට න්‍යෂ්ටික යුද ශීර්ෂ රැගෙන යාමේ හැකියාව පැවැතීම හේතුවෙන් එය රුසියානු න්‍යෂ්ටික අවි ගබඩාවේ තිබෙන මාරාන්තිකම අවියක් ලෙස සැලකේ.
“සාතන් 2” මිසයිලයට එකවර යුද ශීර්ෂ 15 රැගෙන යාමේ හැකියාව පවතින අතර එයට සැතපුම් 11,000 දුරක් ගමන් කිරීමේ හැකියාව පවතී. රුසියානු ජනපති පුටින්ගේ අණ පරිදි “සාතන් 2” යුද්ධය සඳහා සූදානම් කිරීමේ කටයුතු අඛන්ඩව සිදුවන බව රුසියාවේ මූලෝපායික මිසයිල බලකායේ ප්‍රධානී කර්නල් ජෙනරාල් සර්ගෙ කරකායෙව්ද ටාස් පුවත් සේවය වෙත ප්‍රකාශයක් ලබා දෙමින් පවසා ඇත.
පසුගිය සැප්තැම්බර් මාසයේදී කළ “සාතන් 2” මිසයිලයේ අත්හදා බැලීමක් අසාර්ථක වූ අතර එහිදී මෙම මිසයිලය සාර්ථක කර ගැනීමට රුසියාවට හැකියාවක් තිබේ දැයි සැකයක්ද මතුවිය.
ඇමෙරිකාව ලබාදුන් මිසයිල භාවිත කරමින් රුසියාවේ අභ්‍යන්තරයට එල්ල කළ ප්‍රහාරයට පිළිතුරු ලෙස යුක්රේනයේ දිනිප්‍රෝ නගරයට රුසියාව පසුගිය සතියේදී න්‍යෂ්ටික නොවන අන්තර් මහද්වීපික මිසයිල භාවිත කරමින් ප්‍රහාරයක් එල්ල කළ අතර එම තර්ජනය තවත් දැඩි කරමින් රුසියානු ජනපතිවරයා මෙම නියෝගය ලබාදී ඇත.
රුසියාව මේ වනවිට යුක්රේනයට ලබාදුන් අවි භාවිත කරමින් රුසියාව අභ්‍යන්තරයට ප්‍රහාර එල්ල කිරීමට අවසර ලබාදුන් රටවලට අනතුරු ඇඟවීමක්ද නිකුත් කර තිබෙන අතර එක්සත් රාජධානියද තමන් ඕනෑම මොහොතක රුසියාව සමග යුද්ධයකට සූදානම් බවට පසුගියදා ප්‍රකාශ කළේය. තෙවැනි ලෝක යුද්ධයේදී භාවිත කිරීම සඳහා “සාතන් 2” මිසයිලයට පණ දීමට නියෝග කර ඇත්දැයි සැකයක් පවතින බව නියෝගය පිළිබඳ අදහස් දක්වමින් යුද විශ්ලේෂකයෝ මත පළ කළහ.
