ගුරුවරුන්ගෙන් වෙන වාචික අපයෝජන ඉහලට
පාසල තුළදී සිසුන් ගුරුවරුන්ගේ වාචික අපයෝජනවලට ලක්වීම සම්බන්ධයෙන් පැමිණිලි රැසක් ජාතික ළමා ආරක්ෂක අධිකාරිය වෙත ලැබී තිබේ.
ශරීරයේ පැහැය, ශරීරයේ අවයව ආදිය මත යමෙකුට නම් පටබැඳීම, ලජ්ජාවට පත් කිරීම, යටිගිරියෙන් කෑගැසීම, තර්ජනය කිරීම, නින්දා කිරීම, නිරන්තරයෙන් විවේචනය කිරීම සහ සරදම් කිරීම යන වාචික අපයෝජනයන්ට අදාළ පැමිණිලි එලෙස ලැබී තිබෙන බව ජාතික ළමා ආරක්ෂක අධිකාරියේ ජ්‍යෙෂ්ඨ විමර්ශන නිලධාරියෙක් පැවැසීය.
‘‘ගුරුවරුන් අතින් වාචික අපයෝජනවලට ලක්වුණු දරුවන් ගැන පැමිණිලි රැසක් ලැබී තිබෙනවා. එම පැමිණිලි විභාග කරන අවස්ථාවන්හිදී පාසල් කළමනාකාරීත්වය බොහෝ විට ගන්නේ ගුරුවරුන්ගේ පැත්ත. එම අවස්ථාවේදී ළමයාව පාසලෙන් අස්කිරීම දක්වා කනගාටුදායක සිද්ධි ඇති වෙන්න පුළුවන්.
ඒ සියල්ලෙන්ම දරුවා නැවතත් මානසිකව අපයෝජනය වෙනවා. වාචිංක හිංසනයට ලක්වෙන දරුවන් සිය දිවි හානිකර ගැනීමක් දක්වා යොමුවීමේ අවදානමක් තිබෙනවා. ඒ නිසා වාචික හිංසන කියන්නේ ඉතා බරපතළ අපයෝජනයක්’’ යැයි ජාතික ළමා ආරක්ෂක අධිකාරියේ අධ්‍යක්ෂ ජනරාල් අනෝමා සිරිවර්ධන ප්‍රකාශ කළාය.
‘‘ඇතැම් ගුරුවරුන්ගේ වාචික හිංසන ළමයින්ගේ පෞරුෂත්ව වර්ධනය හීන වීමටද සෘජුව බලපා තිබෙනවා. තමන්ගේ බාහිර පෙනුම මත හෝ වෙනත් සාධක මත මානසික පීඩනයක් සිදු වුවහොත් ඒ පිළිබඳව 1929 දුරකථන අංකය ඔස්සේ ජාතික ළමා ආරක්ෂක අධිකාරියට දැනුම් දිය හැකියි. වාචික හිංසනයක් වැනි දෙයක් වුණහම ඒක ඔප්පු කරගන්න සාක්ෂි අවශ්‍යයි. තමන් එවැනි හිංසනයක් නොකළ බව අදාළ වරද කරපු ගුරුවරයා කියන්න පුළුවන්. නමුත් අපට පැමිණිලි කරලා තිබුණොත් ඒක සාක්ෂියක් ලෙස යොදාගත හැකියි’’ යනුවෙන් ජාතික ළමා ආරක්ෂක අධිකාරියේ අධ්‍යක්ෂ ජනරාල් අනෝමා සිරිවර්ධන වැඩිදුරටත් ප්‍රකාශ කළාය.
උපුටාගැනීම: අරුණ
